Prokuroria Themelore Publike Kumanovë ka urdhëruar zhvillimin e një hetimi ndaj një personi fizik dhe një personi juridik, të dyshuar për kryerjen e veprës penale të zgjatur – Mashtrim sipas nenit 247 të Kodit Penal.

I dyshuari, pronar i subjektit juridik, me qëllim të përfitimit të paligjshëm pasuror për vete dhe kompaninë e tij, ka paraqitur në mënyrë të rreme fakte se ai po ndërmjetësonte në shitjen e banesave dhe automjeteve në pronësi të Agjencisë për Menaxhimin e Pasurisë së Sekuestruar – Shkup.

Sipas njoftimeve zyrtare, i dyshuari 35-vjeçar nga Shkupi, u prezantua para dy personave të dëmtuar në Kumanovë si punonjës i Agjencisë për Menaxhimin e Pasurisë së Sekuestruar dhe lidhi kontrata fiktive me ta për shitjen e dyshuar të banesave në Shkup dhe Ohër.

Qytetarët e mashtruar i kanë paguar para, pjesërisht në para të gatshme dhe pjesërisht në llogarinë e entitetit juridik, me çka i dyshuari ka përfituar gjithsej një përfitim të paligjshëm pasuror prej 115,754 eurosh.

Marrë parasysh se janë plotësuar bazat ligjore, prokurori publik do t’i paraqesë gjyqtarit të procedurës paraprake nga Gjykata Themelore në Kumanovë një propozim për caktimin e masës së paraburgimit ndaj të dyshuarit.