Federata e Futbollit të Maqedonisë (FFM) ka dënuar ashpër braktisjen e ndeshjes nga ana e skuadrës së Gostivarit, duke theksuar se nuk do të lejojë shantazhe dhe presione, dhe se do të vazhdojë luftën për një futboll të pastër.

Në ndeshjen e Ligës së Parë të Futbollit të Maqedonisë, mes Gostivarit dhe Rabotnickit, futbollistët e Gostivarit kanë braktisur fushën në minutën e 85-të, menjëherë pasi Rabotnicki shënoi për 1:2.

Sipas FFM, ky akt është një përpjekje e qëllimshme nga individë të caktuar që, për motive financiare dhe pritshmëri të paplotësuara, po mundohen të degradojnë futbollin.

Gjithashtu, FFM thekson se ky veprim vjen si reagim ndaj vendimeve të fundit të Bordit të Drejtorëve të FFM, ku u njoftua një goditje e fortë ndaj krimit dhe korrupsionit në futbollin maqedonas.

FFM siguron opinionin publik se rregullsia e Ligës së Parë nuk do të komprometohet dhe se kampionati do të vazhdojë sipas rregullave dhe rregulloreve të garës. Strukturat kriminale dhe papastërtitë në futboll do të pastrohen plotësisht.

Pavarësisht këtij akti të papërgjegjshëm dhe frikacak, FFM thekson se nuk do të lejojë shantazhe dhe presione, dhe se do të dalë edhe më e fortë nga këto veprime të koordinuara nëntokësore. Voska dhe Gostivari nuk do të njollosin futbollin maqedonas.