Kryetari i Komunës së Qendrës, Goran Gerasimovski, njoftoi se gjatë fundjavës është vendosur një sipërfaqe e re në lulishten e fëmijëve në parkun e Kapishtecit. Rindërtimi i parkut në këtë lagje është në fazën përfundimtare.

Sipas Komunës, në lulishten e fëmijëve është vendosur bar artificial si shtresë e sipërme, ndërsa pllakat ekzistuese të gomës poshtë, të cilat shërbejnë si shtresë amortizuese, janë ruajtur. Sipërfaqja e re plotëson standardet e cilësisë dhe sigurisë, me qëllim që të sigurojë mbrojtjen e shëndetit të fëmijëve dhe mbrojtjen e mjedisit.

“Gjatë kësaj fundjave vendosëm një sipërfaqe të re në lulishten e fëmijëve në Kapishtec, si pjesë e fazës përfundimtare të rindërtimit të plotë të parkut. Në ditët në vijim, do të instalohen pajisje shtesë urbane për fëmijë, duke përfshirë lëkundëse dhe shih-shat. Në periudhën e kaluar, kemi instaluar ndriçim të ri LED, kemi ndërtuar një shteg të ri shëtitjeje, kemi mbjellë gjelbërim të ri dhe fidane dekorative, duke rinovuar gjithsej 7,800 metra katrorë hapësirë publike,” tha Gerasimovski.

Gerasimovski u bëri thirrje qytetarëve që të kujdesen për pajisjet e reja urbane, të mos i dëmtojnë ato dhe së bashku të krijojnë dhe mirëmbajnë një mjedis më të pastër, më të sigurt dhe më të bukur për të gjithë, veçanërisht për më të vegjlit.