Shkup – Në një takim të Grupit Sektorial për Energji, i mbajtur në Ministrinë e Energjisë, Minierave dhe Burimeve Minerale, u analizua gjendja aktuale e furnizimit me energji elektrike dhe aktivitetet e vazhdueshme të aktorëve kryesorë në sistem.

Takimi u fokusua kryesisht në analizën e konsumit gjatë festave të fundit dhe gatishmërinë e sistemit për fundjavën e ardhshme të festave të 1 Majit. U konstatua se rrjeti përballoi me sukses presionin e shtuar, pa ndërprerje të mëdha, dhe se të gjitha kapacitetet mbeten të mobilizuara për periudhën e ardhshme.

AD ESM theksoi se niveli i ujit, i cili në fund të vitit të kaluar ishte në një minimum kritik prej 11%, tani është stabilizuar mbi 30%, falë menaxhimit të kujdesshëm dhe ekonomik të burimeve. Kompania theksoi se po punojnë me një “qasje të përgjegjshme dhe të kujdesshme” që tashmë po jep rezultate.

Gjithashtu u diskutua përparimi i projekteve energjetike në vazhdim, fazat në të cilat ndodhen dhe sfidat me të cilat përballen. Disa prej tyre po përparojnë sipas dinamikës së parashikuar, ndërsa për të tjerat janë iniciuar procedura të brendshme për të kapërcyer vonesat. U vu theksi gjithashtu në planet e ardhshme të investimeve që do të rrisnin sigurinë dhe qëndrueshmërinë e rrjetit elektrik.

Sipas Ministres Bozhinovska, një koordinim i tillë i rregullt është thelbësor: “Çdo vlerësim, çdo analizë dhe çdo hap që ndërmarrim ka një qëllim – furnizim të qëndrueshëm dhe të sigurt për qytetarët dhe ekonominë. Dialogu i vazhdueshëm midis institucioneve është garanci që do t’i adresojmë të gjitha rreziqet e mundshme në kohën e duhur.”

Grupi Sektorial do të vazhdojë me takime dhe raporte të rregullta për publikun, me theks në transparencën dhe një qasje profesionale në menaxhimin e sistemit energjetik kombëtar.