Shkup – Kryetari i Kuvendit, Afrim Gashi, është informuar zyrtarisht sot për ndryshimet në përbërjen dhe strukturën drejtuese të grupit parlamentar të koalicionit “VLEN”.

Sipas njoftimit zyrtar, deputeti Bekim Qoku është emëruar koordinator i grupit parlamentar të VLEN, duke marrë kështu drejtimin e grupit.

Përveç koordinatorit, janë caktuar edhe zëvendëskoordinatorët, të cilët do të jenë deputetët Merita Kolchi Kodzadziku dhe Adnan Azizi. Ata do të ndihmojnë në koordinimin e punës së grupit parlamentar dhe do të kenë rol të rëndësishëm në marrjen e vendimeve.

Përbërja aktuale e grupit parlamentar të “VLEN” përbëhet nga deputetët Afrim Gashi, Adnan Azizi, Bekim Qoku, Kaltrina Beqiri, Imerlie Saliu, Saranda Imeri, Feride Hadjiu, Merita Kolchi Kodzadziku dhe Bekim Sali.

Halil Snopçe, i cili vjen nga krahu i Aleancës për Shqiptarët, i udhëhequr nga Arben Taravari, ka qenë koordinatori i mëparshëm i grupit parlamentar “VLEN”.

Ndryshimet në përbërjen e grupit parlamentar vijnë pas zhvillimeve të fundit politike.

Më parë, grupi parlamentar përbëhej nga 14 deputetë, por tani ka një numër më të vogël anëtarësh.