Shkup, Maqedoni e Veriut – Në ditën e rëndësishme të festës së romëve – Shën Gjergjit (Đurđevden), u formua Grupi Parlamentar Ndërpartiak për mbështetjen e të drejtave të romëve, përfshirjen dhe integrimin e tyre në Republikën e Maqedonisë së Veriut.

Grupi i ri parlamentar synon të adresojë sfidat me të cilat përballet komuniteti rom në vend, duke u fokusuar në përmirësimin e kushteve të tyre të jetesës dhe duke avokuar për të drejtat e tyre.

Në këtë grup do të jenë të përfaqësuar deputetë nga të gjitha partitë politike të Kuvendit, duke treguar mbështetje të gjerë politike për këtë çështje. Deputeti Igor Zdravkovski u zgjodh kryetar i Grupit, ndërsa deputetët Amar Mecinović dhe Arbana Pasholi u zgjodhën zëvendës të tij.

Edhe pse në përbërjen aktuale parlamentare nuk ka përfaqësues të komunitetit rom, ky Grup do të vazhdojë të përfaqësojë qytetarët e këtij etniteti.

Zdravkovski dha informacione mbi shifrat statistikore në lidhje me arsimin, papunësinë dhe përfshirjen institucionale të romëve, të cilat janë shqetësuese. Ai theksoi se nevojiten përpjekje shtesë për të përmirësuar gjendjen e komunitetit rom në vend.

Kryetari i Kuvendit, Afrim Gashi, i cili ishte i pranishëm në konstituimin e Grupit, e përshëndeti këtë nismë dhe shprehu interesim për të marrë pjesë aktive në përmirësimin e të drejtave të romëve.

“Le të jetë ky takim një thirrje ndërgjegjeje për të zgjidhur në mënyrë sistematike problemet e romëve,” tha Gashi. Ai shtoi se kjo bëhet me qëllim të respektimit të Kushtetutës, e cila i trajton të gjithë qytetarët në mënyrë të barabartë dhe deputetët, si më të thirrurit, duhet të bëjnë përpjekje maksimale që askush në vend të mos ndihet i diskriminuar.