Shkup – Në Teatrin Kombëtar të Maqedonisë kanë filluar provat për shfaqjen “Engjëjt në Amerikë” (Pjesa I) të Tony Kushner. Shfaqja do të jetë në regji, përkthim dhe koreografi nga Filip Petkovski.

Producent i shfaqjes është Petar Antevski, skenograf Martin Manev, kostumografe Antonija Guginska-Jordanoska dhe asistente regjisore Antonija Belazelkovska. Premiera e shfaqjes pritet të jetë në fund të majit.

“Engjëjt në Amerikë” është një nga veprat më të rëndësishme dramatike të teatrit bashkëkohor amerikan. Ajo nëpërmjet dy pjesëve paraqet jetën, politikën dhe identitetin në SHBA në vitet 1980, gjatë krizës së AIDS-it dhe rritjes konservatore politike. Përkthimi, adaptimi dhe shfaqja pritet të ofrojnë një lexim modern dhe relevant të kësaj vepre të fuqishme në kontekstin maqedonas.

Realizimi i shfaqjes është një bashkëpunim mes Teatrit Kombëtar të Maqedonisë dhe Shoqatës për Afirmimin e Artit Teatror “Presvrt” – Shkup. Procesi i punës në shfaqje do të zhvillohet gjatë prillit dhe majit të vitit 2025.

Në shfaqje luajnë aktorët: Jordan Simonov, Tanja Kochovska, Natalija Teodosieva, Damjan Cvetanovski, Stefan Spasov, Aleksandar Stoimenovski, Ilina Jovanovski dhe Nela Pavlovska. Me këtë prodhim, TKM dhe “Presvrt” vazhdojnë misionin e tyre për të sjellë projekte aktuale, sfiduese dhe artistikisht të forta në skenën maqedonase.