Në komunën e Çairit ka filluar rindërtimi i sistemit të ujësjellësit dhe kanalizimit në vendbanimin Dijon, një projekt i financuar me 88 milionë denarë (rreth 1.5 milionë euro) nga qeveria. Fillimi i punimeve u shënua nga Zëvendëskryeministri i Parë dhe Ministri i Mjedisit dhe Planifikimit Hapësinor, Izet Mexhiti, së bashku me Kryetarin e Komunës së Çairit, Visar Ganiu.

Mexhiti theksoi se ky projekt madhor do të rindërtojë rrjetin e ujësjellësit, kanalizimit dhe atë atmosferik në rrugët 15 dhe 17, duke lidhur 16 rrugë në vendbanimin Dijon me infrastrukturë të re.

Sipas Mexhitit, Çairi ka marrë afërsisht 3 milionë euro nga qeveria vetëm vitin e kaluar, dhe në fillim të këtij viti janë siguruar mbi 8 milionë euro të tjera në projekte. Ai theksoi se në 10 muaj qeverisje, janë alokuar mbi 11 milionë euro në grante për Komunën e Çairit, krahasuar me 0 denarë të alokuar nga qeveria e mëparshme në vitet 2022, 2023 dhe gjysmën e parë të vitit 2024.

Mexhiti shtoi se qeveria po investon në të gjitha komunat dhe po përfundon punët që duhej të ishin përfunduar shumë më parë. Ai përmendi si shembull Komunën e Çairit, për të cilën, sipas tij, ka pasur një bllokadë 3-vjeçare.