Ka filluar zyrtarisht ndërtimi i impiantit të trajtimit të ujërave të zeza në Manastir, një projekt strategjik mjedisor i cili synon të përmirësojë infrastrukturën për mbledhjen dhe trajtimin e ujërave të zeza.

Në takimin e mbajtur sot në komunën e Manastirit, ku u shënua fillimi i realizimit të projektit, morën pjesë përfaqësues nga Ministria e Mjedisit, Ministria e Financave, konsorciumi i kontraktuar për ndërtimin Lantania-Stenton Gradba-Karkanias, mbikëqyrësi i zgjedhur, kompania Eptisa, përfaqësues të KJP “Niskogradba” dhe përfaqësues të administratës komunale.

Kryetari i komunës së Manastirit, Toni Konjanovski, theksoi se ky projekt është një hap shumë i rëndësishëm drejt mbrojtjes së mjedisit.

Qëllimi kryesor i projektit është të përmirësojë infrastrukturën për mbledhjen dhe trajtimin e ujërave të zeza komunale, në përputhje me direktivën për trajtimin e ujërave të zeza dhe legjislacionin kombëtar.

Sipas kontratës, kohëzgjatja e ndërtimit është 2 vjet, me një periudhë garancie njëvjeçare.

Me ndihmën e BE-së, po ndërtohet një sistem i qëndrueshëm i ujërave të zeza për brezat e ardhshëm, duke investuar në ujë të pastër dhe zgjidhje të gjelbra që do të formësojnë një të ardhme më të shëndetshme dhe më të qëndrueshme.