VMRO-DPMNE akuzon ish-ministrin e Shëndetësisë, Venko Filipçe, për keqpërdorime dhe neglizhencë gjatë mandatit të tij, duke e cilësuar atë si përgjegjës për dështime të shumta në sistemin shëndetësor. Sipas VMRO-DPMNE, Filipçe e shndërroi shëndetësinë në një poligon për tendera familjarë dhe korrupsion, duke lënë pas trauma dhe dështime në vend të reformave.

Partia opozitare thekson se, gjatë kohës që Filipçe ishte ministër, institucionet shëndetësore u trajtuan si mjedis i përshtatshëm për shpërndarjen e tenderëve milionësh. Në vend që të modernizonte shëndetësinë dhe të përmirësonte shërbimet në spitale, Filipçe, sipas VMRO-DPMNE, zgjodhi heshtjen dhe shmangien e reformave thelbësore.

Një nga skandalet më të rënda të përmendura është ai në Klinikën e Onkologjisë, ku pacientët që përballeshin me sfida të përditshme u shfrytëzuan për përfitime financiare. Flakonët e barnave më të reja përfunduan në xhepat privatë dhe më pas në tregun e zi.

VMRO-DPMNE thekson gjithashtu se, pajisjet mjekësore të cilat ishin blerë dhe paguar nga qeveria e mëparshme, qëndruan nëpër depo për muaj të tërë për shkak të paaftësisë së SDS-së. Kjo, sipas tyre, është një tjetër karakteristikë e SDS-së, paaftësia për të funksionuar në mënyrë sinkrone, duke humbur të gjitha vlerat morale dhe profesionale.

Një tjetër akuzë e rëndë është ajo për emërimin e Irina Panovskës si drejtoreshë e Klinikës së Hematologjisë dhe hapjen e rrugës për tenderë publikë për një kompani private në pronësi të babait të saj, “Dr. Panovski”. VMRO-DPMNE pretendon se kjo është dëshmi se Filipçe dhe SDS i kthyen institucionet shtetërore në mjete për pasurimin e familjeve, duke krijuar një mekanizëm të organizuar tenderësh familjarë.

Gjatë pandemisë COVID-19, Filipçe, sipas VMRO-DPMNE, demonstroi më tej paaftësinë e tij, duke e renditur Maqedoninë ndër vendet me shkallën më të lartë të vdekshmërisë, si dhe duke shkaktuar vonesa serioze në procesin e vaksinimit. Në vend të krijimit të një strategjie të koordinuar, Filipçe i detyroi qytetarët të kërkojnë alternativa jashtë vendit.

VMRO-DPMNE thekson gjithashtu se, Filipçe planifikoi të siguronte vaksina përmes një kompanie që merrej me tregtinë e bananeve, me një çmim dy herë më të lartë se mesatarja botërore. Blerja e 200,000 vaksinave përmes kompanisë “Starbi” do të thoshte pagimin e 6 milionë dollarëve shtesë, pa dhënë asnjë shpjegim për këtë transferim të qëllimshëm të fondeve publike.

Së fundi, VMRO-DPMNE e kritikon Filipçen për mosrealizimin e projektit të Qendrës Klinike, duke e cilësuar atë si një premtim të pambajtur të SDS-së. Sipas tyre, Filipçe trashëgoi një projekt të zhvilluar nga qeveria e mëparshme, por vendosi të fillojë një projekt të ri me një vlerë joreale prej 500 milionë eurosh, i cili ende nuk ekziston.

Përkundër dështimeve të pretenduara të Filipçes dhe SDS-së, VMRO-DPMNE thekson se qeveria e tyre e re është e përkushtuar për të realizuar premtimet, duke filluar me rritjen e pagave për punonjësit shëndetësorë dhe realizimin e projektit për Qendrën e re Klinike.