Shkup, Maqedoni e Veriut – Në kuadër të festimeve të Ditës së Evropës, një ngjarje e veçantë dhe argëtuese dedikuar fëmijëve do të mbahet në parkun e qytetit të Shkupit.

Ngjarja “Evropa nëpërmjet syve të fëmijëve” do të zhvillohet të shtunën, më 10 maj 2025, duke filluar nga ora 11:00 në “Shkolka” (Shell).

E organizuar nga Agjencia Kombëtare për Programet Evropiane Arsimore dhe Mobilitetin, ngjarja synon promovimin e vlerave evropiane si miqësia dhe bashkëpunimi, nëpërmjet një performance edukative dhe argëtuese për fëmijët.

Programi kryesor do të përfshijë interpretimin e himnit maqedonas dhe himnit të BE-së nga kori i fëmijëve “Zlatno Slavejche”, si dhe një shfaqje interaktive teatrore me temë “Udhëtim nëpër vendet e BE-së”. Përveç kësaj, do të ketë një DJ set, karaoke për fëmijë dhe zumba e vallëzime për fëmijë (dhe prindër).

Përveç programit kryesor, do të organizohen edhe pika edukative, duke përfshirë punëtori kreative si “Evropa përmes ngjyrave të mia”, një kuiz me titull “Sa dini për Evropën?” dhe një punëtori ku fëmijët mund të krijojnë suvenire evropiane nga plastelina.

Ngjarja është e dedikuar për fëmijët e moshës shkollore dhe parashkollore dhe do të pasurohet me animatorë, rekuizita dhe shpërblime simbolike, duke krijuar një atmosferë të vërtetë evropiane në zemër të qytetit.