Prokuroria Themelore Publike Shkup ka ngritur aktakuzë kundër dy personave, dy vëllezër, të akuzuar si bashkë-kryerës për vrasje dhe tentativë vrasjeje. Sipas aktakuzës, ngjarja ka ndodhur në Araçinovo më 1 nëntor 2024.

Vëllezërit, të moshës 23 dhe 31 vjeç, dyshohet se kanë vrarë një person dhe kanë tentuar të vrasin një tjetër – baba dhe bir. Hetimet kanë zbuluar se ata kishin rënë dakord të takoheshin me viktimat për të diskutuar një borxh të pretenduar prej 7,000 eurosh.

Pas një bisede të shkurtër në vendin e takimit, njëri prej të akuzuarve nxori një pistoletë dhe filloi të qëllonte viktimat. Si pasojë, babai humbi jetën nga plagët e marra, ndërsa i biri pësoi lëndime të rënda trupore.

Prokurori publik ka kërkuar nga Gjykata Themelore Penale Shkup që të zgjasë masën e paraburgimit për dy të pandehurit, duke argumentuar se ende ekzistojnë arsyet ligjore për këtë masë sigurie.