Bashkimi Demokratik për Integrim (BDI) ka akuzuar Presidenten e Maqedonisë së Veriut, Gordana Siljanovska-Davkova, se po dëmton karakterin multietnik të shtetit duke u rreshtuar me Qeverinë. Sipas BDI-së, deklarata e presidentes se numri i deputetëve shqiptarë në shumicën parlamentare nuk ka rëndësi për sa kohë Qeveria ka 61 deputetë, tregon se ekuilibri etnik dhe ndjeshmëria ndaj partneriteteve të koalicionit nuk janë pjesë e prioritetit të saj politik.

Në një deklaratë, BDI shprehet se Siljanovska-Davkova ka braktisur rolin kryesor që duhet të ketë Presidenti i shtetit, atë të arbitrit të drejtë të qëndrimeve të ndryshme politike për të bashkuar të gjithë qytetarët, pavarësisht përkatësisë së tyre etnike, politike apo çfarëdo tjetër.

Partia thekson se në vend që të jetë zëri i obligimit kushtetues për të ndërtuar bashkëjetesë dhe konsensus, Presidentja ka zgjedhur të bëhet zëdhënëse e dominimit mono-etnik.

BDI e sheh këtë qasje si rikthim në kohët e errëta kur majoritarizmi, i fshehur pas “sistemeve të meritës” dhe “respektimit të ligjeve”, ishte mjet për shtypjen sistematike të shqiptarëve.

Partia argumenton se derisa të sigurohen mekanizma shtesë kushtetues dhe politikë që do të garantojnë konsensus në zgjedhjen dhe veprimet e Presidentit, kjo funksion do të mbetet i perceptuar si ekskluzivisht etnik – i fokusuar vetëm në nevojat e popullit maqedonas.

BDI paralajmëron se nëse Siljanovska-Davkova nuk e rishqyrton qëndrimin e saj, ajo rrezikon të njihet vetëm nga një pjesë e popullsisë dhe se populli shqiptar nuk do ta njohë funksionin e saj si të vetin, por si të tjetërsuar dhe jo autentik ndaj karakterit multietnik të shtetit.