Bashkimi Demokratik për Integrim (BDI) ka shprehur shqetësim të thellë lidhur me mosrespektimin sistematik të gjuhës shqipe në faqet zyrtare të ministrive të Qeverisë së Republikës së Maqedonisë së Veriut. Sipas BDI-së, mungesa e përmbajtjeve në gjuhën shqipe në Ministrinë e Energjisë, Ministrinë e Transportit, Ministrinë e Punëve të Brendshme dhe institucione të tjera, nuk është vetëm shkelje e Ligjit për Përdorimin e Gjuhëve, por edhe një përjashtim i qëllimshëm i shqiptarëve nga aksesi në informacionet publike.

BDI thekson se në disa raste, ruhen vetëm formatet e vjetra dygjuhëshe nga qeveria e mëparshme, ndërsa përmbajtjet thelbësore, dokumentet dhe informatat kryesore publikohen ekskluzivisht në gjuhën maqedonase.

Kjo, sipas BDI-së, është një prirje e rrezikshme që shkon përtej neglizhencës teknike dhe përfaqëson një politikë institucionale që kufizon përdorimin praktik të gjuhës shqipe dhe minon themelet e barazisë ndëretnike në vend.

BDI gjithashtu thekson se këto fenomene ndodhin në një kohë kur po tentohet të vihen në pikëpyetje dispozitat kyçe të Ligjit për Gjuhët para Gjykatës Kushtetuese.

Sipas BDI-së, kur institucionet shtetërore fillojnë të injorojnë ose relativizojnë një nga arritjet më të rëndësishme të Marrëveshjes së Ohrit, përdorimin zyrtar të gjuhës shqipe, dërgohet një mesazh i rrezikshëm për të ardhmen e kohezionit shtetëror dhe bashkëjetesës ndëretnike.

BDI kritikon gjithashtu partnerët shqiptarë në Qeveri, duke thënë se ata janë të zënë me grindje të brendshme partiake për çështje të tjera, ndërkohë që heshtin përballë këtij sulmi ndaj të drejtave të qytetarëve shqiptarë. Sipas BDI-së, me këtë heshtje, ata jo vetëm legjitimojnë këtë politikë, por bëhen pjesë e problemit.

Në fund, BDI u bën thirrje institucioneve të respektojnë ligjin dhe Kushtetutën, dhe të ndalojnë kursin diskriminues ndaj gjuhës. BDI thekson se shqiptarët nuk do të pranojnë të trajtohen si qytetarë të dorës së dytë dhe se barazia gjuhësore nuk është privilegj, por e drejtë.