Unioni Demokratik për Integrim (DUI) ka kërkuar një hetim të menjëhershëm dhe transparent në lidhje me rolin e agjencisë së sigurimit “Rubikon” në tragjedinë e ndodhur në Koçan, si dhe lidhjet e saj me institucionet shtetërore. Kjo kërkesë vjen pas protestës së organizuar nga familjet e të rinjve të ndjerë, ku u ngritën pikëpyetje të rënda mbi përgjegjësinë e agjencisë dhe Ministrisë së Brendshme.

DUI ka parashtruar një sërë pyetjesh drejtpërdrejt institucioneve kompetente, në të cilat opinioni publik pret përgjigje urgjente:

• A posedonte “Rubikon” licencë të vlefshme për operim si agjenci sigurimi?
• Sa nga punonjësit e saj ishin të licencuar dhe me çfarë trajnimi?
• Çfarë objektesh apo ngjarjesh të tjera ka siguruar kjo agjenci?
• A i është nënshtruar inspektimit dhe kur? Kush e ka kryer dhe me çfarë rezultatesh?
• Pse policia nuk ka reaguar pavarësisht pranisë së të miturve në ambient – nën sigurinë e “Rubikon” – pas mesnate, shitjes dhe konsumimit të lirë të alkoolit, piroteknisë dhe prishjes së rendit publik?

Sipas DUI, këto nuk janë çështje të natyrës politike të përditshme, por kërkesa për llogaridhënie elementare institucionale. Partia thekson nevojën për të zbardhur plotësisht rolin e “Rubikon” në tragjedi, lidhjet e saj me institucionet shtetërore dhe dështimin e Ministrisë së Brendshme për të vepruar në mënyrë adekuate. DUI konsideron se agjencia “Rubikon” është kthyer në një sinonim për fshehje institucionale.