Dhoma Ekonomike e Maqedonisë së Veriut ka kërkuar nga institucionet kompetente të vendit që të marrin masa të menjëhershme për të normalizuar qarkullimin e kamionëve maqedonas që transportojnë produkte ushqimore në Kosovë. Kjo pas ankesave të anëtarëve eksportues për ndalimin e pajustifikuar të kamionëve në territorin e Kosovës.

Sipas Dhomës Ekonomike, kamionët po mbahen në anën kosovare të kufirit pa shpjegim të duhur, duke shkaktuar dëme ekonomike dhe duke prishur tregtinë. Problemi kryesor qëndron në faktin se këto janë produkte ushqimore, të cilat duhet të jenë në përputhje me standardet shëndetësore dhe të sigurisë, prandaj qarkullimi duhet të jetë i pandërprerë.

Për këtë arsye, sot do të mbahet një takim mes kryetarit të Dhomës Ekonomike të Maqedonisë së Veriut, Branko Azeski, dhe kryetarit të Dhomës së Kosovës, Lulzim Rafuna, me qëllim gjetjen e një zgjidhjeje dhe zhbllokimin e situatës. Qëllimi është që kamionët me produkte maqedonase të mund të arrijnë në destinacionin përfundimtar.

Dhoma Ekonomike thekson se këto situata shkaktojnë dëme serioze ekonomike për eksportuesit dhe kompanitë transportuese maqedonase. Gjithashtu theksohet se po krijohen barriera të pajustifikuara në tregtinë me një partner me të cilin Maqedonia e Veriut ka marrëdhënie të mira dhe një suficit në tregti, duke shkelur marrëveshjet rajonale tregtare dhe standardet për lëvizjen e lirë të mallrave. Dhoma Ekonomike ka njoftuar institucionet relevante dhe po merr të gjitha masat e nevojshme për zgjidhjen e problemit.