Departamenti Policor i Kumanovës ka ngritur padi penale ndaj E.M., 35 vjeç dhe A.R., 25 vjeç, të dy nga Kumanova, për shkak të dyshimit të bazuar mirë se kanë kryer veprën penale “organizim i rezistencës”. Sipas Ministrisë së Brendshme, të pandehurit, në cilësinë e pronarit dhe menaxherit të një lokali hotelierik, kanë vënë muzikë me zë të lartë në lokal, në kundërshtim me vendimin e qeverisë për të respektuar ditët e zisë, të shpallura për shkak të aksidentit tragjik që ndodhi në Koçan.

Incidenti ka ndodhur më 22 mars 2025. Policia ka deklaruar se ata kanë shkelur rendin dhe qetësinë publike, si dhe kanë injoruar vendimin e institucioneve shtetërore, duke përbërë një shkelje të sanksionuar sipas Kodit Penal.

“Kundër dy personave është ngritur padi penale e duhur dhe do të procedohet në përputhje me procedurat ligjore,” thanë nga Departamenti Policor i Kumanovës.