Një zyrtar policor në Kumanovë është denoncuar penalisht për vjedhje të energjisë elektrike, duke shkaktuar dëme të konsiderueshme materiale. Departamenti për Kontroll të Brendshëm, Hetimeve Kriminale dhe Standardeve Profesionale ka ngritur padi penale kundër S.Sh., një punonjës i Departamentit Policor Matejçe në SPB Kumanovë, pranë Prokurorisë Themelore Publike Kumanovë.

Sipas padisë, S.Sh. dyshohet se ka kryer veprën penale të “vjedhjes së energjisë elektrike, energjisë termike ose gazit natyror” sipas nenit 235-a paragrafi 1 i Kodit Penal. Ai akuzohet se nga 1 marsi 2024 deri më 9 janar 2025, me qëllim përfitimin e paligjshëm të pasurisë për vete, pa pëlqimin e Elektrodistribucija DOOEL Shkup-KEC Kumanovë, ka anashkaluar matësin elektrik të regjistruar në emër të A.M. nga fshati Lipkovë.

Më konkretisht, S.Sh. dyshohet se ka lidhur tre fazat me kabllo përpara matësit elektrik direkt në përçuesit elektrikë që çojnë në një objekt hotelerie. Kjo ka bërë që energjia elektrike të përdoret pa u regjistruar nga matësi elektrik, duke shkaktuar dëme materiale prej 398,847 denarësh për Elektrodistribucija DOOEL Shkup.

Përveç padisë penale, Departamenti për Kontroll të Brendshëm ka paraqitur edhe një propozim për të filluar një procedurë për përcaktimin e përgjegjësisë për shkelje të rregullit të punës dhe disiplinës ndaj oficerit policor S.Sh. Si masë paraprake, i është konfiskuar arma e shërbimit dhe municioni.