Një person është dënuar me burg nga Gjykata Penale Themelore Shkup për përhapje të materialeve raciste dhe ksenofobike përmes një sistemi kompjuterik. Vendimi u mor pas një pranimi fajësie nga i pandehuri, i cili pranoi se e kishte kryer veprën për të cilën akuzohej.

Sipas aktakuzës së Prokurorisë Themelore Publike Shkup, i pandehuri, një 30-vjeçar nga Shkupi, më 26 shkurt 2022, përmes rrjeteve sociale, kishte përhapur ide që nxisnin urrejtje ndaj një grupi të margjinalizuar.

Konkretisht, ai kishte komentuar në postime në një portal informativ në lidhje me organizimin e paradës “Pride” në Shkup, duke bërë thirrje për dhunë dhe duke nxitur urrejtje kundër anëtarëve të komunitetit LGBTI.

Gjykata e shpalli fajtor dhe e dënoi me një vit burg, i cili nuk do të ekzekutohet nëse ai nuk kryen një vepër të re penale brenda një viti nga plotfuqishmëria e vendimit. Vendimi XVII K-913/24 i Gjykatës Penale Themelore Shkup është përfundimtar dhe i ekzekutueshëm.

Prokuroria Themelore Publike Shkup theksoi se i kushton rëndësi të veçantë rasteve të tilla, duke monitoruar aktivisht procedurat dhe duke caktuar një prokuror publik të posaçëm për to, duke marrë parasysh standardet evropiane për mbrojtjen nga urrejtja dhe diskriminimi.