Kuvendi i Maqedonisë së Veriut dhe UNICEF-i kanë zhvilluar një debat konsultativ për situatën e fëmijëve dhe adoleshentëve në vend. Ky takim është i pari në një seri të dakordësuar me Kuvendin për të avancuar më tej agjendën e të drejtave të fëmijëve.

Gjatë takimit u diskutuan çështje kyçe që kërkojnë përpjekje të vazhdueshme, duke përfshirë koordinimin, mosdiskriminimin, dhunën ndaj fëmijëve, fëmijët me aftësi të kufizuara, si dhe shërbimet shëndetësore dhe arsimore.

Kryetari i Kuvendit, Afrim Gashi, theksoi se qasja e barabartë në arsim, vëmendja më e madhe ndaj politikave shëndetësore dhe mbrojtja nga dhuna dhe diskriminimi duhet të jenë prioritetet kryesore. Ai siguroi mbështetje për çdo iniciativë që kontribuon në këtë drejtim, duke theksuar rëndësinë e forcimit të bashkëpunimit ndërinstitucional dhe rritjes së investimeve për përfshirjen e çdo fëmije.

Përfaqësuesja e UNICEF-it, Lesley Miller, u shpreh e sigurt se së bashku do të vazhdojnë të bëjnë progres në realizimin e të drejtave të fëmijëve, nëpërmjet miratimit të ligjeve dhe buxheteve, sigurimit të mbikëqyrjes së zbatimit të tyre dhe mbi të gjitha, përmes lidershipit dhe angazhimit të përbashkët. Ajo theksoi se investimi në të drejtat e fëmijëve nuk duhet të shihet si shpenzim, por si investim në fëmijët e sotëm dhe të ardhmen e Maqedonisë së Veriut.

Diskutimi u bazua në Analizën e Situatës së Fëmijëve dhe Adoleshentëve në Maqedoninë e Veriut, e cila u zhvillua me mbështetjen e UNICEF-it në vitin 2024, për të shqyrtuar progresin e vendit drejt realizimit të të drejtave të fëmijëve dhe arritjes së Qëllimeve të Zhvillimit të Qëndrueshëm, duke mos lënë asnjë fëmijë pas.

Raporti thekson se, pavarësisht progresit të mirë të bërë në disa fusha të të drejtave të fëmijëve, veçanërisht në uljen e vdekshmërisë foshnjore dhe të fëmijëve, progresi në fusha të tjera ka ngecur ose madje ka rënë. Shkallët e larta të varfërisë së fëmijëve, rezultatet e dobëta të të nxënit dhe përdorimi i përhapur i disiplinës së dhunshme në shtëpi janë sfida të vazhdueshme. Në të njëjtën kohë, kanë dalë probleme të reja, duke përfshirë ndotjen e ajrit dhe rreziqet e tjera mjedisore, shëndetin mendor të fëmijëve dhe adoleshentëve, si dhe dhunën në internet dhe gjuhën e urrejtjes.

Në fund të debatit konsultativ, pjesëmarrësit ranë dakord të organizojnë informime shtesë me komisionet parlamentare përkatëse për të diskutuar fushat për harmonizimin e mëtejshëm të legjislacionit kombëtar me dispozitat e Konventës për të Drejtat e Fëmijës. Këto rekomandime mbulojnë masa në fushat e koordinimit, mosdiskriminimit, dhunës ndaj fëmijëve, fëmijëve me aftësi të kufizuara, shërbimeve shëndetësore dhe arsimore.