Nxënës nga shkollat fillore të Shkupit patën mundësinë të vizitojnë Kabinetin e Presidentes Gordana Siljanovska-Davkova dhe të asistojnë në ceremoninë solemne të ndërrimit të flamurit shtetëror. Kjo ngjarje e veçantë u zhvillua të premten dhe përfshiu nxënës nga shkollat “Gjorgjija Pulevski” nga komuna e Aerodromit, si dhe “Shën Kliment Ohridski” dhe “Kiril Pejçinoviç” nga komuna e Kisella Vodës.

Vizita e nxënësve u zhvillua në prani të mësuesve të tyre dhe kulmoi me spektaklin e ceremonisë solemne të ndërrimit të flamurit shtetëror. Kjo ceremoni, që zhvillohet çdo të premte të dytë të muajit, kryhet nga Batalioni i Nderit i Ushtrisë së Maqedonisë si shprehje respekti për flamurin maqedonas si simbol shtetëror.

Pas ceremonisë, nxënësit patën mundësinë të vizitojnë ambientet e Kabinetit Presidencial dhe të bisedojnë me Presidenten Siljanovska-Davkova. Gjatë bisedës, Presidentja ndau me ta detaje nga puna e saj, por edhe nga jeta e saj personale, duke filluar nga fëmijëria, shkolla, ditët studentore dhe karriera e saj profesoriale.

Presidentja i inkurajoi nxënësit të mësojnë dhe të besojnë në vetvete, si dhe të respektojnë dijen, sepse ajo do t’i bëjë ata konkurrues, të sigurt dhe të suksesshëm. Kjo vizitë dhe bisedë e hapur me Presidenten ishte një përvojë e paharrueshme për nxënësit e shkollave fillore të Shkupit.