Shkup – Bashkimi Demokratik për Integrim (BDI) ka reaguar ashpër ndaj vendimit të kryeministrit dhe qeverisë për të udhëtuar në Emiratet e Bashkuara Arabe (EBA) për një vizitë njëjavore, pa përfshirë asnjë përfaqësues nga partitë politike shqiptare në qeveri. BDI e konsideron këtë veprim si një tjetër në një seri poshtërimesh dhe nënvlerësimesh ndaj partnerëve të koalicionit dhe, më e rëndësishmja, ndaj popullit shqiptar në vend.

Në një deklaratë zyrtare, BDI thekson se me këtë vendim, qeveria tregon qartë se partitë shqiptare që vendosën të jenë pjesë e këtij përbërje qeveritare janë tërësisht të parëndësishme, thjesht statistika të heshtura, pa peshë, pa zë dhe pa të drejtë të marrin pjesë në formimin e politikave shtetërore.

Delegacioni i dërguar në EBA nuk ishte një vizitë turistike, por një delegacion shtetëror me implikime të drejtpërdrejta në marrëdhëniet ekonomike dhe politike të vendit. Sipas BDI, mungesa e përfaqësuesve të partive shqiptare dërgon mesazhin se shqiptarët nuk janë faktor kur bëhet fjalë për ndërtimin e së ardhmes së shtetit. Partia vlerëson se kjo nuk është thjesht një poshtërim për partitë, por një poshtërim edhe më i madh për të gjithë shqiptarët, duke injoruar ekspertët, sektorin e biznesit, diasporën dhe kontributin e tyre në shtet.

BDI argumenton se qeveria po krijon dy kategori qytetarësh: ata që janë mbajtës të shtetit dhe të tjerët, të cilët trajtohen si mysafirë në shtëpinë e tyre.

Si një parti që ka luftuar për dekada për barazi, pjesëmarrje dhe dinjitetin e shqiptarëve, BDI thekson se nuk mund të heshtë përballë veprimeve të tilla. Sipas tyre, këto veprime janë një konfirmim i mëtejshëm se qeveria nuk e kupton dhe nuk e respekton thelbin e karakterit multietnik të shtetit. Në vend të barazisë, ata thonë se po hasin injorim, dhe në vend të partneritetit, poshtërim.

BDI i bën thirrje kryeministrit të kërkojë falje publike ndaj shqiptarëve dhe të japë llogari para publikut nëse ky është vizioni i tij për të ardhmen.

Partia gjithashtu i bën thirrje partive shqiptare në qeveri të vlerësojnë nëse, me heshtjen e tyre, po bëhen bashkëfajtore në këtë diskriminim.

BDI riafirmoi se do të mbetet zëri dhe mburoja e shqiptarëve dhe se nuk duhet të lejojë që kjo politikë e injorimit dhe asimetrisë të bëhet normë.