Bashkimi Demokratik për Integrim (BDI) ka shprehur shqetësime të thella në lidhje me drejtimin aktual të Qeverisë, duke theksuar se ajo po e largon vendin nga rruga evropiane dhe po minon stabilitetin e brendshëm. Sipas BDI-së, veprimet e Qeverisë po çojnë në një krizë të thellë politike dhe kërkojnë një rivlerësim politik përmes zgjedhjeve të parakohshme parlamentare.

BDI akuzon Qeverinë për dështim në prioritetet strategjike të interesit shtetëror, duke vënë në pikëpyetje vazhdimin e negociatave me Bashkimin Evropian. Sipas tyre, Qeveria, e motivuar nga qëllime populiste para zgjedhjeve lokale, e ka anashkaluar plotësisht dosjen evropiane të vendit.

Gjithashtu, BDI kritikon kryeministrin për braktisjen e obligimeve që rrjedhin nga Marrëveshja e Prespës dhe për refuzimin e amendamenteve kushtetuese që do të përfshinin pakicat e tjera. Kjo, sipas BDI-së, tregon se presioni i zgjedhjeve e ka larguar Qeverinë nga rruga evropiane, e cila ishte shpallur si prioritet numër një.

BDI paralajmëron se veprimet e Qeverisë po minojnë mekanizmat e Marrëveshjes së Ohrit, duke rrezikuar karakterin multietnik të shtetit, i cili është themeli i stabilitetit dhe prosperitetit afatgjatë.

Sipas BDI-së, Qeveria ka kapur sistemin gjyqësor, duke e vënë atë në funksion të interesave personale dhe partiake. Ata theksojnë se mungesa e negociatave ka mundësuar dominimin e Qeverisë mbi Prokurorinë Publike dhe Gjyqësorin.

BDI argumenton se zgjedhjet e parakohshme parlamentare, së bashku me ato lokale, janë të nevojshme për të siguruar stabilitet politik afatgjatë dhe për të krijuar hapësira që elitat politike të angazhohen në një proces thelbësor për shpëtimin e dosjes evropiane të vendit. Kjo, sipas BDI-së, do të jetë mundësia e fundit për t’u rikthyer në rrugën evropiane së bashku me Shqipërinë dhe Malin e Zi.