Një 49-vjeçar nga Tetova, N.L., u arrestua dje nga policia rrugore pasi u kap duke drejtuar automjetin me shpejtësi tej normave të lejuara. Ai po drejtonte një automjet të tipit “Honda” me targa të Tetovës me shpejtësi 111 km/h në rrugën rajonale Tetovë-fshati Jazhincë, një zonë ku kufiri maksimal i shpejtësisë është 50 km/h.

N.L. është ndaluar në stacionin policor të Tetovës. Pas dokumentimit të plotë të rastit, kundër tij do të ngrihet kallëzim penal në bazë të nenit 297-a të Kodit Penal, i cili ka të bëjë me “drejtimin e rrezikshëm të automjetit”. Autoritetet po hetojnë rrethanat e incidentit.