Policia e Kumanovës ka kryer bastisje në shtëpitë e dy personave nga Kumanova, D.H. (47) dhe D.G. (51), si dhe në ambientet e një kompanie në pronësi të D.G., për shkak të dyshimeve për keqpërdorim të të dhënave personale dhe regjistrim të paautorizuar. Hetimi vjen pas publikimit të një videoje në rrjetet sociale në fillim të gushtit, e cila tregonte ndërtesën e policisë së Kumanovës, automjete zyrtare dhe sigurinë fizike të filmuara me dron gjatë ceremonisë me rastin e festës shtetërore të 2 gushtit – Ilinden.

Gjatë kontrollit në shtëpinë e D.H. u gjet një dron, gjashtë fishekë, si dhe disa akte noteriale dhe dokumentacion, të cilat do t’i nënshtrohen procedurave të mëtejshme. Ndërsa, në shtëpinë e D.G. u gjetën 14 dronë.

Të dy personat janë marrë në pyetje në stacionin policor. Autoritetet po punojnë për zbardhjen e plotë të rastit, pas së cilës do të dorëzohet kallëzim penal.