Shkup – Ministrja e Arsimit dhe Shkencës, Vesna Janevska, theksoi se arsimi demokratik është thelbësor për krijimin e brezave aktivë, të vetëdijshëm për të drejtat e njeriut dhe që veprojnë me përgjegjësi. Kjo u tha në punëtorinë përfundimtare “Forcimi i Shkollave për Arsim Demokratik – Arritje dhe Rezultate”, pjesë e projektit “Arsim Cilësor për të Gjithë”, zbatuar nga Këshilli i Evropës që nga viti 2023 me fonde nga Republika Federale e Gjermanisë.

Janevska theksoi se procesi arsimor duhet të drejtohet drejt të menduarit kritik, zhvillimit të përgjegjësisë, vetëdijes për të drejtat dhe detyrimet e njeriut, konstruktivitetit dhe respektit. Ajo shprehu kënaqësinë që Maqedonia ka partnerë ndërkombëtarë të rëndësishëm në zhvillimin e arsimit demokratik.

Ministrja Janevska theksoi se nëse 25 shkollat pjesëmarrëse në projektin dyvjeçar kanë krijuar një identitet në ndërtimin e një sistemi demokratik të menaxhimit dhe risive, në drejtim të përfshirjes së nxënësve në vendimmarrje, formave të organizimit të tyre për ushtrimin e të drejtave etj., kjo mund të integrohet në zgjidhjet ekzistuese ligjore.

Ajo siguroi se Qeveria është e hapur për bashkëpunim dhe se ka gjithmonë hapësirë për përmirësimin e arsimit nga të gjitha aspektet, duke mirëpritur çdo praktikë ose iniciativë pozitive.