Një shtetas 32-vjeçar nga Shtipi, me iniciale D.V., u arrestua në Dibër pasi u kap duke drejtuar automjetin nën ndikimin e alkoolit. Ngjarja ndodhi në orën 01:15 të mëngjesit në rrugën “Yusuf Grvala”.

Gjatë një kontrolli rutinë nga ana e policisë, automjeti “Renault” me targa të Kavadarcit që drejtohej nga D.V. u ndalua. Testi i alkoolit zbuloi se ai kishte 1.81 promila alkool në gjak.

Personi në fjalë u përjashtua menjëherë nga trafiku. Pas dokumentimit të plotë të rastit, kundër tij do të ngrihet kallëzim penal në bazë të nenit 297-a të Kodit Penal – “drejtim i pakujdesshëm i automjetit motorik”.

Në kuadër të kontrolleve të shtuara të trafikut rrugor, policia e Dibrës ndaloi edhe tre drejtues të tjerë automjetesh që drejtonin nën ndikimin e alkoolit gjatë natës. Këta persona u përjashtuan menjëherë nga trafiku dhe iu lëshuan urdhër-pagesa përkatëse. Kontrollet u zhvilluan nga ora 23:00 e natës së kaluar deri në orën 05:00 të mëngjesit të sotëm.