Një 41-vjeçar nga Strumica, i identifikuar si T.A., është arrestuar nga policia pasi tentoi të sulmonte oficerët gjatë kryerjes së detyrës zyrtare. Incidenti ndodhi dje në orën 21:30 në rrugën “Krushevska Republika”.

Sipas Sektorit për Punë të Brendshme (SPB) Strumicë, policia kishte vërejtur fillimisht T.A. duke drejtuar një furgon “Mercedes” me shpejtësi të madhe dhe në mënyrë të pasigurt.

Gjatë ndalimit, oficerët zbuluan se regjistrimi i automjetit kishte skaduar. Për më tepër, pas testit të alkoolit, u konstatua se ai ishte nën ndikimin e alkoolit, me një nivel prej 0.96 promil.

Situata eskaloi kur, pasi u informua se automjeti i tij do të konfiskohej, T.A. filloi të godiste furgonin dhe më pas nxori një thikë me të cilën tentoi të sulmonte policët.

Policia njoftoi se pas dokumentimit të plotë të rastit, ndaj tij do të ngrihet kallëzim penal përkatës.