Një 49-vjeçar nga fshati Dolno Konjarë, Kumanovë, është arrestuar pasi është kapur duke drejtuar automjetin nën ndikimin e fortë të alkoolit. Incidenti ka ndodhur dje pasdite rreth orës 17:00 në rrugën “Boris Kidriç”.

Sipas Sektorit për Punë të Brendshme Kumanovë, oficerët e policisë kanë ndaluar një automjet “Renault” me targa të Kumanovës, i drejtuar nga N.M. (49).

Gjatë kontrollit, testi i alkoolit ka treguar një nivel të lartë prej 3.46 promila alkool në gjak.

Menjëherë pas konstatimit të situatës, drejtuesi është larguar nga trafiku dhe është ndaluar në stacionin policor.

Autoritetet policore kanë njoftuar se pas dokumentimit të plotë të rastit, kundër tij do të ngrihet kallëzim penal për “rrezikim të trafikut” sipas nenit 297-a të Kodit Penal.

Policia u bën thirrje qytetarëve që të mos përfshihen në trafik nën ndikimin e alkoolit, pasi kjo paraqet rrezik serioz për ta dhe pjesëmarrësit e tjerë në trafik.