Dy banorë të Kumanovës u arrestuan mbrëmë pasi tentuan të sulmonin fizikisht një lojtar nga ekipi vendas dhe t’i hiqnin fanellën gjatë pushimit të ndeshjes së basketbollit. Incidenti ndodhi në sallën sportive të shkollës së mesme “Pero Nakov” në Kumanovë, gjatë pushimit të ndeshjes midis MKK Kumanovo dhe MZT Skopje, e cila u luajt si pjesë e Super Ligës së basketbollit.

Sipas informacioneve nga Ministria e Punëve të Brendshme, të dyshuarit tentuan të sulmonin një lojtar nga ekipi vendas, MKK Kumanovo, dhe t’i hiqnin fanellën.

“Më datë 17.05.2025 në ora 20:00, oficerët policorë nga SPB Kumanovë kanë arrestuar A.J. (36) dhe D.S. (29), të dy nga Kumanova”, informoi Ministria e Punëve të Brendshme.

“Personat janë ndaluar në stacionin policor, dhe pasi rasti të dokumentohet plotësisht, kundër tyre do të ngrihet padi adekuate”, thanë nga policia.