Tensionet politike janë rritur në Maqedoninë e Veriut pasi lideri i Bashkimit Demokratik për Integrim (BDI), Ali Ahmeti, paralajmëroi mundësinë e protestave të rrugës nga mbështetësit e partisë. Shkak për këtë është bërë procesi gjyqësor ndaj ish-ministrit Kreshnik Bekteshi, i cili po ndiqet penalisht për licencën e diskotekës “Puls” në Koçan, ku ndodhi një zjarr tragjik.

Ahmeti e konsideron këtë si persekutim politik dhe deklaroi se ata nuk do të tërhiqen derisa të sigurohet drejtësi jo-selektive dhe zgjedhje të parakohshme parlamentare. Ai theksoi për TV24 se “Nëse Ali Ahmeti del në rrugë, nuk ka kthim prapa. Ai proces mund të përfundojë vetëm me zgjedhje të parakohshme parlamentare.”

Këto deklarata shkaktuan reagime të menjëhershme nga kundërshtarët e tij politikë, koalicioni VLEN, i cili theksoi se rruga i takon popullit, jo milionerëve që kanë frikë nga drejtësia. Sipas VLEN, BDI, e cila ka qenë në pushtet për një kohë të gjatë, nuk ka dalë kurrë në rrugë për popullin, por tani “kur sistemi që ai ndërtoi për vete po shembet, Ali Ahmeti qan për ‘rrugën’, sepse froni po i rrëshqet nga duart dhe lugë nga goja!”

Koalicioni VLEN e pyeti Ahmetin se ku ishte ai kur, gjatë sundimit të tij me Gruevskin, shqiptarët po mbyteshin në burgje dhe atyre u ngjitej etiketa “terrorist”. Ata gjithashtu përmendën rastet e “Montstrum”, akuzat për terrorizëm në Sopot, gjakderdhjen shqiptare në Brodec dhe ngjarjet në Divo Naselje, duke i konsideruar si skenarë të ndyrë politikë.

VLEN shtoi se BDI po përpiqet të paraqitet si viktimë, por sipas tyre, e vetmja gjë që i frikëson është drejtësia dhe votat e popullit.