Aleanca për Shqiptarët (ASH) ka njoftuar zyrtarisht kalimin e saj në opozitë, pas një takimi të mbajtur në selinë qendrore në Tetovë. Vendimi vjen pas mosmarrëveshjeve me koalicionin “VLEN” dhe pakënaqësive të shprehura nga qytetarët shqiptarë në lidhje me qeverisjen aktuale.

Kryetari i ASH-së, Arben Taravari, deklaroi se ndryshimet e premtuara nga partia nuk janë realizuar plotësisht, duke shkaktuar kritika të vazhdueshme nga qytetarët. Si rezultat, partia ka vendosur t’u rikthehet qytetarëve për të kërkuar besimin e tyre në zgjedhjet lokale të tetorit.

Taravari theksoi se përpjekjet për të gjetur një gjuhë të përbashkët me “VLEN” për mbështetje reciproke të kandidatëve për kryetar komune kanë dështuar. Ai shtoi se nëse ka mosbesim dhe komplote brenda qeverisë, është më mirë të jesh jashtë dhe t’i rikthehesh qytetarëve.

Pakënaqësia e shqiptarëve me mënyrën se si “VLEN” po qeveris është e madhe, sipas Taravarit. Një nga shqetësimet kryesore është Ligji për Përfaqësim të Drejtë, ku shqiptarët ankohen se trajtimi i të punësuarve në administratë është përkeqësuar.

Pavarësisht kalimit në opozitë, Aleanca për Shqiptarët e konsideron rrugën evropiane të Maqedonisë së Veriut si shumë të rëndësishme. Taravari theksoi se kjo do të jetë një periudhë e vështirë për vendin dhe se anëtarësimi në BE sa më shpejt të jetë e mundur është thelbësor.