Tre persona akuzohen për abuzim me detyrën zyrtare dhe autoritetin, duke dëmtuar buxhetin e komunës së Lozovës në vitin 2018. Sektori për Punë të Brendshme në Shtip ka ngritur akuza penale kundër A.V. (48) nga Lozovo, T.G. (51) nga Shkupi dhe L.L. (68) nga Shkupi.

Sipas hetimeve, A.V., në cilësinë e kryetarit të komunës së Lozovës në vitin 2018, i ka mundësuar një subjekti juridik nga fshati Studeniçan fitim të paligjshëm prej 205,800 denarësh, duke dëmtuar po aq edhe buxhetin e komunës.

Më konkretisht, më 01.11.2018, A.V. ka marrë vendim për realizimin e një prokurimi publik për ndërtimin e një shtegu këmbësorësh në rrugën “Revolucioni i Tetorit” në Lozovo. Subjekti juridik në fjalë është zgjedhur si ofertuesi më i favorshëm, dhe T.G. është caktuar si udhëheqës i punimeve të ndërtimit.

Punimet e ndërtimit janë përfunduar në mars të vitit 2019. Në librin e ndërtimit dhe në ditarin e ndërtimit janë futur të dhëna të rreme se janë vendosur 381 metra katrorë pllaka bekaton, me vlerë 205,800 denarë. Librin dhe ditarin e kanë nënshkruar T.G. dhe L.L., ky i fundit në cilësinë e mbikëqyrësit të ndërtimit.

A.V., megjithëse ka qenë në dijeni se shuma për arkëtim nuk ishte e vërtetë, ka lejuar që të paguhen 205,800 denarë më tepër nga ajo që është realizuar në të vërtetë.