Departamenti i Policisë në Kumanovë ka ngritur akuza penale ndaj F.A. nga Kumanova për shkak të dyshimit se ka kryer veprën penale të “shpërdorimit të detyrës zyrtare dhe autoritetit”.

Sipas policisë, i akuzuari, në cilësinë e drejtorit të Institucionit Shëndetësor Publik “Qendra Shëndetësore” Kumanovë, nga viti 2020 deri në vitin 2024, ka lidhur kontrata të paligjshme pune dhe ka punësuar persona në institucion pa miratimin paraprak nga Ministria e Shëndetësisë.

Më tej, pa marrë pëlqimin nga Ministria e Financave, ai ka punësuar ilegalisht gjithsej 127 persona, duke vepruar në kundërshtim me Ligjin për Marrëdhëniet e Punës dhe Ligjin për Transformimin në Punësim të Rregullt, siç është konstatuar nga Inspektorati Shtetëror i Punës.

Si rezultat i këtyre veprimeve, i akuzuari ka paguar ilegalisht paga këtyre personave në vlerë totale prej 21,594,510 denarësh, duke dëmtuar buxhetin e ISHP “Qendra Shëndetësore” Kumanovë me këtë shumë.