Prokuroria Themelore Publike e Manastirit ka ngritur akuza ndaj 10 personave në lidhje me abuzime të dyshuara në REK Manastir, duke shkaktuar dëme të konsiderueshme në buxhetin e ndërmarrjes.

Sipas aktakuzës, shtatë persona akuzohen për “Keqpërdorim të Detyrës Zyrtare dhe Autoritetit”, ndërsa tre zyrtarë të Byrosë së Prokurimit Publik akuzohen për “Kryerje të Papërgjegjshme të Detyrës”.

Konkretisht, tre anëtarë të Komisionit të Ekspertëve, të ngarkuar me vlerësimin e ofertave për gërmimin e zhveshjes në REK Manastir, akuzohen se kanë eliminuar në mënyrë të paligjshme ofertën e një operatori ekonomik, pavarësisht se ky i fundit kishte paraqitur prova që plotësonte kushtet e përcaktuara në dokumentacionin e tenderit.

Më pas, tre anëtarë të Komisionit të Prokurimit Publik kanë pranuar këtë opinion të ekspertëve dhe kanë ftuar në ankandin elektronik vetëm dy operatorë të tjerë ekonomikë, të cilët kishin ofruar çmime fillestare më të larta se kompania e eliminuar.

Drejtori i REK Manastir akuzohet se ka pranuar propozimin për përzgjedhjen e ofertës më të favorshme, megjithëse ai ishte në kundërshtim me dispozitat e Ligjit për Prokurimin Publik. Më pas, ai ka lidhur një kontratë për gërmimin e zhveshjes investuese në minierën “Brod Gneotino” me kompaninë RUD-KOP import-eksport DOOEL Manastir, në vlerë prej 708,000,000 denarësh, duke përfshirë TVSH-në.

Gjithashtu, drejtori akuzohet se ka lidhur një aneks të kontratës, duke rritur vlerën e prokurimit publik me 20% shtesë, ose 120,000,000 denarë, pa kryer paraprakisht një analizë të kostos-efektivitetit shtesë dhe pa siguruar plotësisht fondet e nevojshme, siç kërkohet me ligj.

Zyrtarët e Byrosë së Prokurimit Publik akuzohen se, gjatë shqyrtimit të dokumentacionit të prokurimit, nuk kanë konstatuar se oferta e një operatori ekonomik ishte refuzuar në mënyrë të paligjshme dhe kanë udhëzuar në mënyrë të paligjshme autoritetin kontraktor që të vazhdojë me procedurën e prokurimit dhe të lidhë kontratën.

Prokurori publik kompetent ka paraqitur në Gjykatën Themelore në Manastir një propozim për konfiskimin e përfitimit të paligjshëm pasuror prej 178,370,319 denarësh, i cili i është paguar subjektit juridik DPTU RUD-KOP import-eksport DOOEL Manastir si rezultat i veprave penale të kryera nga të pandehurit. Këto fonde janë të bllokuara në një llogari deri në një vendim të gjykatës.