Një 50-vjeçar u lëndua rëndë në një aksident trafiku që ndodhi në qendër të Shkupit.

Aksidenti ndodhi rreth orës 07:15 në kryqëzimin e rrugëve “Metropolit Teodosij Gologanov” dhe “Aminta Treti” kur një automjet “Volkswagen Golf”, i drejtuar nga 37-vjeçari A.B. nga Shkupi, goditi këmbësorin I.N., 50 vjeç, gjithashtu nga Shkupi.

Sipas informacioneve nga Ministria e Punëve të Brendshme, këmbësori u dërgua në Spitalin e Përgjithshëm të Qytetit “Shën Naum Ohridski” ku iu konstatuan lëndime të rënda trupore.

Ekipet e Departamentit të Punëve të Brendshme të Shkupit kryen një inspektim në vendngjarje dhe për rastin u informua prokurori publik nga Prokuroria Themelore Publike e Shkupit.

Shkaqet e aksidentit janë ende duke u hetuar.