Agjencia e Ushqimit dhe Veterinarisë (AHV) ka gjobitur 14 mishpërndarës në të gjithë vendin me një shumë totale prej 8,350 euro në kundërvlerë denari për shkelje të ndryshme të konstatuara gjatë kontrolleve të jashtëzakonshme.

Sipas AHV-së, inspektimet janë kryer më 30 prill dhe kanë rezultuar me shkatërrimin e 323 kilogramëve ushqim të pasigurt.

Nga kontrollet e kryera, janë konstatuar defekte në zbatimin e praktikave të mira të prodhimit dhe higjienës tek shtatë operatorë, ndërsa katër mishpërndarës nuk kishin kryer kontrolle sanitare të detyrueshme të punonjësve.

Gjithashtu, tre mishpërndarës kishin parregullsi në etiketimin e produkteve, dhe tre të tjerë nuk ishin të regjistruar si operatorë ushqimorë pranë AHV-së. Për të gjitha shkeljet e konstatuara, AHV ka marrë masa ndëshkimore dhe ka lëshuar 23 vendime për eliminimin e mangësive të identifikuara.