Shkup – Drejtoria e Tatimeve Publike (DTP) ka shprehur shqetësim lidhur me përmbushjen e detyrimeve për tatimin mbi vlerën e shtuar (TVSH). Sipas të dhënave të fundit, një numër i konsiderueshëm tatimpaguesish nuk kanë përmbushur detyrimet e tyre në kohë.

Sipas DTP-së, deri më 25 korrik 2025, 142 tatimpagues mujorë dhe 2,134 tatimpagues tremujorë nuk kanë dorëzuar deklaratat e TVSH-së. Përveç kësaj, është regjistruar borxh i papaguar i TVSH-së për 1,326 tatimpagues mujorë dhe 7,748 tatimpagues tremujorë.

DTP ka dërguar tashmë njoftime personale tek të gjithë tatimpaguesit e TVSH-së që kanë deklaruar, por nuk e kanë paguar borxhin për periudhën tatimore përkatëse. Drejtori i Drejtorisë së Tatimeve Publike, Elena Petrova, u bëri thirrje të gjithë tatimpaguesve që nuk i kanë përmbushur detyrimet e tyre ligjore që të veprojnë menjëherë.

Petrova theksoi se mosrespektimi i afatit ligjor është një shkelje e rëndë dhe se disiplina tatimore nuk është një zgjedhje, por një detyrim ligjor dhe përgjegjësi e çdo qytetari dhe kompanie. DTP ka paralajmëruar se pas dërgimit të paralajmërimeve, do të vazhdojë me mbledhjen e detyrueshme nga të gjithë tatimpaguesit që nuk e paguajnë vullnetarisht borxhin.

Në përpjekje për të shmangur bllokadat e llogarive dhe kostot shtesë për mbledhjen e detyrueshme, DTP ka vënë në zbatim një sërë aktivitetesh dhe masash, përmes veprimit të koordinuar dhe komunikimit intensiv me tatimpaguesit dhe kontabilistët. Për çdo ditë vonese, llogaritet kamatë prej 0.03% të borxhit të mbetur.

DTP thekson se mbetet në komunikim të vazhdueshëm me të gjitha palët e interesuara, për të ofruar informacione në kohë dhe përmbushje të detyrimeve, si dhe për të siguruar një histori solide tatimore.