DUI u bën thirrje të gjitha partive politike parlamentare të mbështesin projektligjin e tyre për vettingun, duke e konsideruar atë si një domosdoshmëri për të rikthyer besimin e qytetarëve në drejtësi dhe institucione. Partia thekson se procesi i vettingut duhet të jetë i gjithëpërfshirës dhe i pakompromis, me mbikëqyrje ndërkombëtare.

Sipas DUI, kjo nismë nuk është thjesht një projekt politik, por një kusht thelbësor për drejtësi dhe një të ardhme më të drejtë për të gjithë qytetarët. Ata theksojnë se drejtësia nuk matet me deklarata, por me vendime konkrete.

DUI kërkon gjithashtu një hetim ndaj të gjitha partive politike, pa përjashtim, për periudhën e 33 viteve të fundit. Kjo përfshin verifikimin dhe kontrollin e origjinës së pronës së të gjithë mbajtësve të funksioneve publike gjatë kësaj periudhe: ministra, deputetë, kryetarë bashkish, drejtorë, gjyqtarë, prokurorë – të gjithë, pa përjashtim.

Një tjetër pikë e rëndësishme e kërkesave të DUI është hetimi i thellë i procesit të privatizimit, i cili, sipas tyre, në shumë raste shërbeu si bazë për krijimin e oligarkëve të paprekshëm. Ata theksojnë se ky kapitull i errët nuk duhet të mbetet i pazgjidhur.

Për më tepër, DUI kërkon një hetim mbi veprimet e shërbimeve të sigurisë së shtetit, si dhe zyrtarët që ishin pjesë e atyre shërbimeve nga viti 1945 e tutje: OZNA, UDB-a, SDB, DBK, UBK, ANB. Zëvendëskryetari i DUI-së, Arber Ademi, theksoi se kjo është një kërkesë e kahershme e partisë.