Një shofer i afërt me Zoran Zaevin është arrestuar për zjarrvënie, duke ngritur shqetësime mbi përfshirjen e mundshme të strukturave pranë SDS në shkaktimin e zjarreve në vend. Mile Lefkov, deputet nga VMRO-DPMNE, deklaroi se arrestimi i A.N., shoferit të Zoran Zaev, për zjarrvënie, nxjerr në pah pyetje të rëndësishme.

Sipas Lefkov, arrestimi i shoferit të Zaev ngre pikëpyetje mbi përfshirjen personale të Venko Filipçe, duke pasur parasysh afërsinë dhe lidhjen e tyre. Ai pyeti nëse ekziston një grup i organizuar brenda SDS që merret me ndezjen e zjarreve dhe shkaktimin e kaosit në vend.

Lefkov i bëri thirrje Filipçes që, nëse nuk qëndron bashkë me Zaevin prapa zjarreve, të distancohet publikisht nga ai.

Sipas informacioneve të partisë, shoferi i Zaev ka ndezur zjarr në zonën e digës së Vodoçës në Strumicë. Lefkov theksoi se kjo është dëshmi që zjarret në Maqedoni nuk janë një fatkeqësi natyrore, por një skenar i qëllimshëm nga SDS dhe njerëz pranë tyre, me qëllim krijimin e paqëndrueshmërisë dhe kaosit në vend.

Ai bëri thirrje institucioneve të dënojnë shoferin e Zaev me dënimin më të ashpër, por në të njëjtën kohë të hetojnë se deri ku shkon linja e komandës. Lefkov shprehu pritshmërinë që prokuroria publike të mos e mbrojë shoferin e Zaev. Ai shtoi se duhet të ketë përgjegjësi, si për zjarrvënësit, ashtu edhe për mentorët e tyre politikë.