Kryeministri Hristijan Mickoski deklaroi sot se rehabilitimi i konvikteve të studentëve është një projekt i rëndësishëm i cili ka qenë i bllokuar në procedura të gjata, por tani më në fund po realizohet. Kjo deklaratë u bë gjatë vizitës së tij në konviktin e studentëve “Kuzman Josifovski – Pitu” në Shkup.

Mickoski theksoi se ky projekt është i një rëndësie të veçantë, jo vetëm për këtë konvikt, por për të gjitha konviktet e tjera në vend. Ai siguroi se projekti është zhbllokuar dhe është me rëndësi që ai të përfundojë, në mënyrë që të rinjtë të kenë kushte akomodimi më të mira.

Kryeministri shprehu bindjen se ndryshimi në konvikt, krahasuar me gjendjen e mëparshme, është i madh. Ai gjithashtu shpresoi që studentët të fillojnë të vendosen në konvikt që nga viti i ardhshëm.

Mickoski nënvizoi se qëllimi i Qeverisë është realizimi i projekteve dhe reformave, sepse kjo është ajo që presin qytetarët. Ai shtoi se synimi është ndërtimi dhe jo si në të kaluarën, kur sipas tij ka pasur vjedhje të mëdha.