Shkup – Deputeti Mile Lefkov, anëtar i KE-së së VMRO-DPMNE-së, deklaroi se Maqedonia e Veriut pret një qëndrim nga Bullgaria në lidhje me propozimin e Presidentit Mickoski për një Rezolutë të përbashkët në Parlamentin Evropian për mbrojtjen e identitetit dhe gjuhës maqedonase. Ai e bëri këtë deklaratë gjatë një konference për shtyp.

Lefkov theksoi se propozimi u paraqit me dy qëllime kryesore: nëse Bullgaria është e sinqertë dhe nuk e konteston identitetin dhe gjuhën maqedonase, atëherë ajo do ta pranojë propozimin dhe do ta dorëzojnë Rezolutën së bashku. Por, nëse Bullgaria nuk është e sinqertë, atëherë ajo do të mundohet ta shmangë me çdo kusht.

Sipas Lefkov, aktualisht po vërehet se Bullgaria po i largohet idesë, duke treguar një qëndrim jo demokratik, jo miqësor dhe jo njerëzor ndaj Maqedonisë së Veriut.

Ai shtoi se zërat që po qarkullojnë nga disa qarqe në Bullgari pasqyrojnë narrativën që Rusia ka ndaj Ukrainës, me mohimin e plotë të veçantisë maqedonase. Lefkov theksoi se Maqedonia e Veriut e di se kush është dhe këtë e di e gjithë bota, por fakti që Bullgaria e mohon këtë dhe dëshiron të minojë të drejtat themelore të njeriut, jep një sinjal të qartë se të gjithë duhet të pyesin veten se pse ndodh kjo dhe nëse BE-ja do të lejojë që vendi të jetë viktimë e politikave të shekullit të 19-të, politikave të mohimit të veçantisë, të njëjta në shkallë si ato që Rusia i zbaton ndaj Ukrainës.

Në fund, Lefkov theksoi se Maqedonia e Veriut është mbi të gjitha një fqinj i mirë, një shtet anëtar i NATO-s dhe se e vetmja gjë që dëshiron, si popull, është të respektohet dhe të trajtohet si të gjithë të tjerët.