Një aksident i rëndë trafiku ka ndodhur në orët e para të mëngjesit të sotëm pranë fshatit Kalishtë, Strugë, duke lënë një 40-vjeçar me lëndime serioze.

Sipas informacioneve nga Policia e Strugës, ngjarja ka ndodhur rreth orës 01:00 në rrugën rajonale. Automjeti i tipit “BMW”, me targa të Strugës, drejtuar nga R.V., nga fshati Bellicë e Poshtme, ka dalë nga rruga pasi drejtuesi ka humbur kontrollin.

Drejtuesi i plagosur është transportuar menjëherë në Spitalin Special “Shën Erazmo” në Ohër. Atje, mjekët kanë konstatuar lëndime të rënda trupore.

Një ekip inspektimi nga Stacioni Policor Strugë ka kryer ekspertizë në vendin e ngjarjes. Autoritetet policore po punojnë për të zbardhur shkaqet që çuan në këtë aksident.