Koalicioni “Vlen” do të mblidhet sot në orën 14:00 për të diskutuar mbi hapat e ardhshëm pas deklaratës së Arben Taravarit, kryetarit të Aleancës për Shqiptarët, se partia e tij do të marrë pjesë në zgjedhjet lokale me lista të veta për këshilltarë.

Pas takimit, opinionit publik do t’i komunikohet pozicioni i “Vlen”, sipas Zëvendëskryeministrit të Parë, Izet Mexhiti, i cili është pjesë e koalicionit.

Arben Taravari deklaroi se Aleanca për Shqiptarët do të qëndrojë në koalicionin “Vlen” derisa të përjashtohen. Ai shtoi se nëse ndodh një gjë e tillë, do të veprojnë në përputhje me rrethanat.

Lidhur me kandidatët për kryetarë komunash, Taravari tha se ende nuk është marrë asnjë vendim.

Kjo mbledhje e koalicionit “Vlen” vjen si përgjigje ndaj vendimit të Taravarit për të garuar në zgjedhjet lokale me lista të pavarura për këshilltarë, çka e vë në pikëpyetje unitetin e koalicionit për zgjedhjet e ardhshme.