Shkup – Bashkimi Demokratik për Integrim (BDI) ka reaguar ashpër ndaj informacioneve të fundit skandaloze që lidhen me Inspektoratin për Zbatimin e Ligjit për Përdorimin e Gjuhëve, institucion ky që luan një rol kyç në mbikëqyrjen dhe zbatimin e të drejtës për përdorimin zyrtar të gjuhës shqipe.

Sipas BDI-së, inspektorët e këtij institucioni nuk kanë marrë pagat e tyre për më shumë se katër muaj dhe janë lënë pa sigurime sociale dhe shëndetësore, duke rrezikuar sigurinë e tyre dhe të familjeve të tyre. BDI e konsideron këtë si një strategji të qëllimshme për të shkatërruar institucionin, duke detyruar inspektorët e trajnuar dhe të licencuar të largohen nga puna dhe duke paralizuar sistemin e kontrollit.

BDI e sheh këtë veprim si një fazë të një sulmi më të gjerë dhe të koordinuar ndaj statusit të gjuhës shqipe në Republikën e Maqedonisë së Veriut. Sipas tyre, fillimisht është hequr pavarësia e Inspektoratit, duke e vendosur atë nën juridiksionin e Ministrisë së Drejtësisë, gjë që e ka bërë institucionin politikisht të varur. Më pas, sipas BDI-së, ka pasuar një shpërfillje sistematike e ligjit nga institucionet, ku ministritë, ndërmarrjet publike dhe faqet e tyre të internetit janë pastruar nga përmbajtjet në gjuhën shqipe. Tani, sipas BDI-së, po goditet vetë institucioni që u formua për të mbrojtur ligjin.

Njëkohësisht, Gjykata Kushtetuese po shqyrton Ligjin për Gjuhët nën presion, me mundësinë e shfuqizimit të dispozitave të tij kyçe. BDI e konsideron këtë si një operacion të qëllimshëm për të çmontuar të gjithë sistemin e ndërtuar rreth përdorimit zyrtar të gjuhës shqipe.

BDI u bën thirrje të gjithëve, pavarësisht nga etnia, orientimi politik apo pozicioni në shoqëri, që të ngrenë zërin. Ata i ftojnë përfaqësuesit e sektorit civil, qytetarët, intelektualët, mediat dhe partnerët ndërkombëtarë të reagojnë, duke theksuar se gjuha shqipe nuk është një simbol, por një e drejtë kushtetuese, barazi, paqe dhe dinjitet.