Asmir Jahoski, biznesmen i njohur, ka ofruar një garanci prej 2 milionë eurosh për të siguruar lirimin e tij nga paraburgimi. Ai është nën hetim për pastrim parash.

Prokuroria Publike ka deklaruar se është e gatshme ta pranojë garancinë, por me kushtin që Jahoski të depozitojë edhe 72,000,000 denarë shtesë në një llogari të posaçme të gjykatës. Kjo shumë, sipas prokurorisë, përfaqëson shumën e përfitimit të paligjshëm të përfituar nga i dyshuari.

Në reagimin e saj, prokuroria theksoi se propozimi i të dyshuarit për zëvendësimin e masës së paraburgimit me një garanci në pasuri të paluajtshme me vlerë të vlerësuar prej 60,672,235 denarësh, mund të merret parasysh vetëm nëse ai depoziton edhe 72,000,000 denarë shtesë. Kjo shumë do të shërbente si garanci për kompensimin e dëmit të mundshëm në një procedurë të mëtejshme.

Prokuroria ka kërkuar gjithashtu nga gjykata që të vendosë masa paraprake ndaj të dyshuarit, duke përfshirë ndalim të largimit nga vendbanimi, detyrim për raportim periodik në një autoritet shtetëror kompetent dhe konfiskim të përkohshëm të dokumentit të udhëtimit ose dokumentit tjetër për kalimin e kufirit shtetëror.

Prokuroria theksoi se ka siguruar një pjesë të madhe të provave materiale dhe verbale, gjë që zvogëlon rrezikun që ai të fshihet, falsifikojë ose shkatërrojë gjurmët e krimit ose të pengojë procedurën penale duke ndikuar te dëshmitarët. Sipas prokurorisë, vetëm me përcaktimin e të gjitha masave të lartpërmendura, do të konsiderohet se janë plotësuar kushtet për heqjen e masës së paraburgimit të vendosur më parë.