Seanca gjyqësore për vrasjen e qenit endacak Feliks është shtyrë, duke shkaktuar reagime nga aktivistët e të drejtave të kafshëve. Ata kanë paralajmëruar një protestë paqësore më 15 qershor (e diel), duke filluar nga ora 12:00, përpara Ministrisë së Punëve të Brendshme.

Iniciativa qytetare ZELEN HUMAN GRAD (QYTETI I GJELBËR NJERËZOR), organizatore e protestës, ka shprehur shqetësim për shtyrjen e seancës. Sipas tyre, shtyrja është bërë për shkak të arsyeve shëndetësore të avokatit të të pandehurit, pikërisht në momentin kur mbrojtja duhej të fliste. “Rastësi apo jo?”, pyesin ata.

Nga Green Human City deklarojnë se Zlate Dimeski, i propozuar nga mbrojtja dhe i pranishëm në vendin e ngjarjes, duhej të dëshmonte. Ai kishte sjellë shkopin me të cilin ishte vrarë Feliksi dhe videot tregojnë atë duke vëzhguar heshtazi me duart pas shpine, ndërsa Feliksi rrihej pa mëshirë dhe më vonë ndërroi jetë.

Sipas Green Human City, dhënia e mundësisë vrasësit të mbrohet nga një person që mund të konsiderohet me të drejtë bashkëpunëtor – një vëzhgues i heshtur që jo vetëm nuk u përpoq të ndalonte dhunën kundër një kafshe të pafajshme në asnjë moment, por është edhe ai që siguroi armën për ekzekutimin e vrasjes, përfaqëson padrejtësi shtesë dhe një shtrembërim të dhimbshëm të së drejtës për një gjykim të drejtë.

Shoqata pyet: “Sa do të presim për drejtësi për Feliksin, duke marrë parasysh të gjitha shtyrjet, festat vjetore, pushimet gjyqësore? A do ta marrim fare?”

Në protestë, ata do të kërkojnë zgjidhje të menjëhershme të çështjes dhe dënimin maksimal me burg për kryesin Ljube Krstevski dhe bashkëpunëtorin e tij Branko Bilbilovski, futjen e një minimumi prej 1 viti burgim të detyrueshëm për krimin e vrasjes dhe torturës së kafshëve sipas Kodit Penal, formimin e shërbimeve lokale (komunale) për mbrojtjen e kafshëve, miratimin e një ligji për Policinë Komunale (me polici për kafshët), masa parandaluese për të reduktuar dhunën ndaj kafshëve, dhe edukim sistematik.