Pas ndeshjes së tensionuar mes Strugës dhe Gostivarit, tre lojtarë të Gostivarit dhe një anëtar i stafit teknik u ndaluan dhe u morën në pyetje nga policia në Strugë. Ngjarja ndodhi pas barazimit 1:1 në ndeshjen e vlefshme për javën e 28-të të Ligës së Parë të Futbollit të Maqedonisë.

Klubi i Futbollit Gostivari njoftoi vonë të dielën se policia në Strugë kishte ndaluar tre lojtarët e tyre dhe një anëtar të stafit stërvitor. Sipas klubit, të ndaluarit u mbajtën në pyetje për pesë orë dhe nuk iu lejua të kontaktojnë me shokët e skuadrës apo familjarët e tyre.

“Tre lojtarë tanë dhe një anëtar i stafit tonë stërvitor u ndaluan në stacionin policor në Strugë dhe u morën në pyetje për pesë orë. Ata nuk lejohen të kontaktojnë as me shokët e tyre të skuadrës, as me të afërmit e tyre. Menaxhmenti dhe drejtori ynë sportiv kanë pritur përpara stacionit me orë të tëra duke shpresuar të marrin ndonjë informacion,” thuhet në deklaratën e KF Gostivarit.

Ndeshja, e cila përfundoi me rezultatin 1:1, u karakterizua nga tensione të larta që kulmuan pas përfundimit të saj. Incidenti mes lojtarëve të të dyja skuadrave çoi në ndërhyrjen e policisë.

Federata e Futbollit e Maqedonisë dhe institucionet përkatëse pritet të reagojnë dhe të nisin procedura për të sqaruar rrethanat e incidentit. Detaje të mëtejshme rreth shkakut të ndalimit dhe natyrës së incidentit nuk janë bërë ende të ditura.