Tre persona humbën jetën dje në një aksident tragjik në rrugën Kërçovë-Gostivar, si pasojë e shpejtësisë së tepërt. Lajmin e bëri publik Ministri i Punëve të Brendshme, Pançe Toshkovski.

Sipas informacioneve fillestare, njëri nga drejtuesit e automjeteve po lëvizte me shpejtësi tej normave të lejuara, duke shkaktuar përplasjen fatale. Drejtuesi i mjetit që shkaktoi aksidentin ka ndërruar jetë.

Ministri Toshkovski theksoi se numri i viktimave në trafik për tremujorin e parë të këtij viti është i ngjashëm me atë të vitit të kaluar, duke shtuar se shifrat janë katastrofike në krahasim me standardet evropiane.

Ai u bëri thirrje drejtuesve të automjeteve që të respektojnë rregullat e qarkullimit rrugor dhe kufizimet e shpejtësisë. Ekspertët theksojnë se në përplasje ballore me shpejtësi mbi 70 km/h, shanset për të mbijetuar janë zero.