SDSM ka reaguar ashpër ndaj propozimit të Ministrit të Kulturës, Zoran Ljutkov, për t’i dorëzuar trashëgiminë kulturore sektorit të biznesit. Sipas tyre, kjo do të shndërronte vlerat që tregojnë historinë, formojnë kujtesën dhe identitetin kolektiv, në një marrëveshje biznesi.

Opozita e konsideron këtë propozim si një ideologji të rrezikshme që nuk duhet të kalojë pa u vënë re.

“Trashëgimia kulturore nuk është hotel. Nuk është qendër tregtare. Nuk është një copë tokë për investim. Është baza prej së cilës jemi bërë si popull, si komunitet, si shtet. Nuk matet me fitim, por me kuptim”, theksojnë nga SDSM.

Ata paralajmërojnë se nëse trashëgimia kulturore i dorëzohet tregut, ajo do të humbet. Ndërtesat mund të mbeten, por askush nuk do të tregojë historinë e tyre. Do të kemi monumente pa kuptim dhe rrugë turistike pa shpirt.

SDSM thekson se trashëgimia kulturore nuk “riparohet” me PPP (Partneritet Publiko-Privat) ose me një partner privat, por ruhet me dashuri, me njohuri, me ekspertizë dhe me një vizion të qartë.

“Trashëgimia kulturore nuk është vetëm një gjurmë e së kaluarës, ajo është një lidhje e gjallë që na lidh me rrënjët, identitetin dhe vetëdijen tonë kolektive”, shtojnë nga partia opozitare.

Ata argumentojnë se ruajtja e trashëgimisë kulturore do të thotë të ruash shpirtin e një kombi, të drejtën e tij për t’u kujtuar dhe për të ekzistuar.

SDSM përfundon duke theksuar detyrimin për të mbajtur dhe ushqyer trashëgiminë kulturore dhe për t’ia kaluar brezave të ardhshëm. Ata i bëjnë thirrje Ministrit Ljutkov të largohet nëse nuk e kupton këtë. Kur trashëgimia kulturore bëhet plan biznesi, ajo nuk është më kulturë, por treg, thonë nga SDSM.